«Узвы́шша» (1927—1931) — літаратурна-мастацкі часопіс (“часопіс літаратуры, мастацтва і крытыкі”), створаны сябрамі аднайменнага літаратурнага згуртавання.
Лічыцца адным з самых адметных і значных літаратурна-мастацкіх выданняў у гісторыі беларускай літаратуры. З 1927 па 1930 г. выдаваўся літаратурным аб’яднаннем “Узвышша”, а ў 1931 г. — Беларускім дзяржаўным выдавецтвам у Мінску. Усяго было выдадзена 44 нумары часопіса ў 39 кнігах.
На старонках часопіса друкавалі свае творы, а таксама літаратурна-крытычныя артыкулы Кузьма Чорны, Уладзімір Дубоўка, Адам Бабарэка, Кандрат Крапіва, Змітрок Бядуля, Пятро Глебка, Сяргей Дарожны, Максім Лужанін, Язэп Пушча, Тодар Кляшторны, Лукаш Калюга, Андрэй Мрый і інш. Шматлікія са змешчаных у часопісе твораў зрабіліся прыкметнымі здабыткамі нацыянальнай літаратуры (раман “Запіскі Самсона Самасуя” А. Мрыя, аповесці “Лявон Бушмар” К. Чорнага, “Ні госць ні гаспадар” Л. Калюгі, паэма “Кругі” У. Дубоўкі і інш.).
Не меншую цікавасць і значнасць уяўляюць надрукаваныя ў выданні літаратуразнаўчыя, крытычныя і моўныя артыкулы, у якіх уздымаліся разнастайныя актуальныя пытанні і праблемы, прапаноўваліся творча-эстэтычныя стратэгіі і мастацкія канцэпцыі.
